2Cor 11 | BJR | STEP | Ínni Koorinti máqusanaasa qinée Pauroosa fúrufaramandee qímannimianaqa irisée sía minnísaaqa káqi minára irisée sía minnísaaqa káqi minára irisée máriaqa.

2 Corinthians 11

Pauroofa únna amaana ufa qímariasara aaquqímannimáqaidanoo.

1 Ínni Koorinti máqusanaasa qinée Pauroosa fúrufaramandee qímannimianaqa irisée sía minnísaaqa káqi minára irisée sía minnísaaqa káqi minára irisée máriaqa. 2 Qinée ínni Koorinti máqannaasara qeeqá qíraamunara foora maréeqéeqa ásauku mundirana utáaqamamaqaqaunanoo mináindikiqa máriaqeera minára rairaiqídaqa. Ínnee andeeqára mánaaqara foommáfiqa miná faqa máriaqa. Maqásaa qaraa rairaiqíranau nímidau. Ánutunaindaraa rairaiqírana nímidaqa. 3 Óoqai sakáni fannoo narí káaqa írira únnufannai Éeuana ákaru qundée kai ínni írirafa faqa íandoora. Ásauku mundíranasaa kai ínni írirafa ámiqimandee andeeqásee mundínoo mári ínanoo káqi rúnna fifóora minára qinée ínniara rufíaidaqa.

4 Óoqai indaarú maasá Yísunara qímannimiafanaqa. Miqóoqari maasá fúafanaqa akaqáusa ínnee unnái óonurandee ínniki anirée ínni únna amaana ufa qímannimiqau. Akaqáusa dapi fasiqauqá aniréeqa Yísunara moómau qímannimufaqa ínnee áaqamáseeqa asasammásee misá mara quqáseeqa misá mandá ufamau fímariafanoo. Misá maraquna faqa misá únna fasaasa ufa faqa sía maasá qíafannamau qímannimiafaqa náriara moómau qímannimiafaqa ínnee káqi maráafanoo.

5 Mi-unnaqira fasiqáusa náriara Yísufa niqiqoo fasiqausa úriqararausee qídaqa. Qinée Pauroosa sía misá úreeqarasau máridau misá úriqararausa máridaqa. 6 Misá ufa akoofásauqa máriafaqa sía qinée ámiqimandee misá naanna ráunausa mammáqidaqa kásooqaqee ufa qímannimidaqa, íriranara ámiqimandee iriséeqa misá óorinaaqaramásee qímannimiqiafana. Maasá aiqáma kari óosana óosana ufannai maasá ámiqira írirana akooqóo kooroommásee qímannimiqiafana.

7 Qinée sía únnaqi maría fasiqausa naanna réeqa qinée Ánutuna ámiqira fasaasa ufa ínni qímannimidaqa káqi kaaqóo miná akiaqara munnimma moodáa faqa sía uqanna máraqiafana. Ínnee Ánutuna áfusaa úriqararausa máriaqee qímasee qinée reendeenámafiqa óorudupi máfifaqa qeeqá aináiniranannai qeeqá nárana ainaina mara náidaqa sía ínni nárana máreeqa. Qinée áaqaidee miqí marí qiafana. 8 Qinée ínniki aináini marúnaqa moo máqannaasa Yísuna ufara suqímariasa misá nári nárana marara munnimma qímiafaqa qeeqá nárainaina minánnai máraqiafana. Qinée ínni dadaaqídaqa misá munnimma úmmuariara foora máraqiafana. 9 Qinée ínniki máriafanna kamuqoo qeeqá nárana munnimma sía márufaqa sía ínni munnimma moodáa marasee nárana mara naqíafana. Qiní qíkaqaafasaauqa Maseedoonia máqannaasa náriqa munnimma maréeqee qiní qimana kái qímufaqa marasée nárana mara née maríqiafana. Óoqai miqí maríafannana kafáa maqee maaqóo márunnaqooqari sía ínnindi máraanaura. Ínnee áaqarana marasáifaqa náqimmásee fee ínni áaqara ufannái andeeqánnisaanauree ínni nárana munnimma qímunara irisée qisaurúanoora. Qinée Pauroosa minára ínni qímannimidaqa.

10 Qinée ásauku mundírana ánoona ufa óorisaa máridaqa qíma afeekaíkira ufa qímannimidaqa sía uqanna ínni nárana ainaina máraanauranoo aiqáma Kirisa máqa maaqaki máriasa nárana ainaina sía uqanna máraanauranoo, sía moó fannoo qiní ufa áruannoo. 11 Qinée nánaree maa-ufána ínni qímannimidee. Qinée ínniara qímuqusirana síaisee marídee maa-ufána qímannimidee. Qinée ínniara qímuqusimárunnana Ánutufa dóo íridanoo.

12 Óoqai ía̱fánandee kai íqa maqee sía ínni nárana munnimma máraanaura. Únnaqira niqiqoo fásiqausa ínniki ani máriasa ínni nárana munnimma máraidaqa náriara Pauroona aináini márina aana ráidee qímasee maasá faqa niqiqoo fasiqausa máridee qifoora sía qinée misá naanna rámasee ínni nárana munnimma máraanaura. Sía qinée nári nifaaqa mara máree úrimaria óosana dadaaqianáura. 13 Mi-fasiqáusa sía kúqaa niqiqoo fásiqausau máridau misá níkaru qíra niqiqoo fasiqausa máridaqa, náriqa aináiniranara únna ufa qímasee ásauku mundírafa ánoona niqiqoo fásiqausara foora quándakiqa misá nimammana usufíqa níkaru qídaqa. 14 Sía minára tautíaqa, Sadannafa faqa miqí kai ímarifa máridanoo, miná aanandáidaqa miqídaqa, mifá káaqa qára qangiroo nimammana usufínoo márifa márifaqa misá miná aannandáidaqa miqídaqa. 15 Sadannana aináini mária fasiqausa andeeqára fasiqauqa nimammana usufíqa aináinirafa sía firaa ainaina, nárindi máridanoo. Kásooqaqee taikára aukuana andeeqásee mi-manda oosanná amana kái máreefaranoo.

Pauroofa Yísuna ufasáara aupúrarana máree marunara kooroo inau.

16 Qinée kafáa ínni qímannimidaqa sía moó fannoo qiníara fúrufarira fasiqee qíannoo. Ínniki únna ufa qímaria fasiqausa fúrufarirausa firaaqóo nári núqu uqéeraidaqa nári nimooqímariasa máridaqa. Ínnee qiníara fúrufarira fasiqee qífaqa qinée faqa fúrufaramasee misá naanna raanáura.

17 Karaambáiqa sía maasára miqíaqee qifaqá qinée káqikaaqóo fúrufarammasee misá naannarée qeeqá qimooqíanaqa ínnee mi-unna qimaria fasiqáusa ufa íriandee íqa qiní ufa faqa íriaqeera. 18 Moómoo unna ufa qímariasa faiqí faiqi írirana marasée nári núqu uqéeraidaqa nári nimooqídaqa. Dóo qinée faqa miqímmianaura. 19 Ínnee Koorinti máqannaasa ínni írirafa firaaqóo márisa máriafanoo fúrufarira fasiqauqa ufa qímariasa ínnee asasammásee misá marasée misá ufa írimariafanoo. 20 Misá ínni níkaruqimasee ínni aináina úmmuari maríasa máridaqa, misá ínnikinaa úriqarausara foora máridaqa ínniara miqíaqa maaqíaqa qímariafaqa misá ufaanara foora fufúsee ínni rarisámeeqee minakí mara áridaqa. Misá náriara úriqararausee qídaqa ínniara uréeqarausee qídaqa. Misá nísaukusamu ínni nóori rukámidaqa. Misá miqí mándee ínni nímiafaqa ínnee áaqamasee káqi misá maréeqee ínneeqa ufa suqíranaki quqásee ínnee misá ufa ámiqimmasee írimariafanoo. 21 Qinée Pauroosa ínnikina máriafannaqoo misá óosana máraaqaana qinée qisaurídaqa qímannimidaqa qinée máparaa ímarunausa sía misá óosana máraqiafana. Ínniki únnaqira niqiqoo fasiqausa náriqa núqu uqéerasee nári nimooqídaqa qinée misá fúrufarirana amana kái qeeqá fúrufariannana qimooqíanaqa íriaqa.

22 Misá náriara sía Kirisa máqannaasa ufa kai qídaqa maasá qikeekú qikaakú Heeburu ufa qímarunausee qiafaqa qinée faqa miqí kai qímarunausa máridaqa. Misá náriara Isaraee máqannaasa Ánutuna utáaqa máqoosa máridee qiafaqa qinée faqa misá kai máridaqa. Misá náriara Abarahaamana áiku ásauku Ánutuna qíma afeekaikíra ainaina máraanausee qiafaqa, qinée faqa misá kai máridaqa. 23 Misá náriara ásauku mundírana áiku ásauku máridee qiafaqa qinée faqa fúrufarira fasiqara foora qídaqa qinée misáki misá úriqararausa máridaqa. Qiní ásauku mundírana mi-ainainnára írunnana misáindi óoraaqaranoo máridanoo. Qinée Yísuna ufa sáara karabúsaki misá úrinnaaqarammasee moómoo kari rumbéeqa. Ráitasamunnai qifaaqa ateekéeufa moómoo kari misá nárírana úrinnaaqaramasee qiní qifaaqa ateekáqau. Qinée kúqirara madikakíqari moómoo kari misá nárírana úrinnaaqaramasee fíndi fíqa. 24 Moodáannai qísaukunamu kari Yuda máqannaasa ráitasamu dárímariqau, moodáa fasiqa áiku ásauku taikásee moo fásiqa qísaukuqara faqa moodaannai qiku faqa dínni qiku éera kai muqu quqásee kari minánnai dáriqau. Sía moodáannai miqímandee dáriqau, moodáannai qísauku amanasáa miqímandee daru qímaqáqau. 25 Roomma máqannaasa faqa qaaramoo kári miqí uqannamándee dáriqau. Moodáa kari misá óonisamu misá daru qimaqáqau. Qaaramoo kári ooruku námmariki sípaki moo máqusai Yísuna ufa qímannimirara fídaqa sípa fannoo mandáikufaqa ooruku námmariki úkunnaqa máriqiafana sía kúqiqiafana. Moo kári miqí mámbufaqa eendáki faqa fáasaana faqa ooruku námmari qámbaanai qimmápiqa áfainni ániqiafana.

26 Qinée Yísuna ufa qímannimiqa nímariafanaqa moómoo aukuana maqúsa maqúsa núafannanakina qinée moómoo kari qímeekee maríqiafana nammári áufunaki faqa nipuráraa fasiqauqaki faqa Yuda máqannaasaki faqa ánaamuru máriasaki faqa firaa taunaki faqa káasau maqa maaqa óombura maqa maaqaki faqa ooruku námmari firaa farumaki faqa qíkaru qímaru aqoondisa faqa misáuqakina moómookari kúqirara qímeekeeqa.

27 Qinée minakí fídaqa kadáapirirana faqa tooqaamu dárirana faqa máraidaqa moómoo kari sía faiqéeqa, qinée dáararee marúfaqa nammáriara dídimarufaqa nímariqiafana, qinée moómoo kari qiní máaqa faqa nárana faqa qamunna faqa sía márufaqa káqi qísukunni faiqaqá nímariqiafana. 28 Moómoo ainaina ummaara máraqanuafannanakiqari moodáa ainainará kai qianáura. Maqúsa maqusa Yísuna ufara suqímaríanara kai qinée óonumafi íriqa nídaqa. 29 Moó fannoo misakíqari ummooqukínoo kudoosaápaifaqa qinée faqa miná aanna ráidaqa kudoosaápaidaqa. Moó fannoo misakíqari mandáinainaki áqufifaqa qiní daundura faqa rapíkifaqa mi-ummaarána máraidaqa.

30 Qinée qeeqá qimooqíqa qeeqá ummooqukíranara qimooqianáura. 31 Ánutufa maasá karaambáiqa Yísuna akoofa náaru náaru miná áuqu ámiqi ámiqirafa kai máriani, mifá kai qiníara sía únnaqi marí fee qídanoo, íridanoo. 32 Óoqai qinée Damasakusa máqusai máriafananoo misá karaambáiqa miná áuqu Areetasafa narí uréeqarana aqiqoofanoo narí sundía námufaqa maqúsa kooqíki ititáfufaqa qiní qumaráanee qímasee maqúsa kooqíkiaqa rakísimariqau. 33 Qiní qíqoondíuqa minára irisée káqitinai qiní maréeqee firaa pateeuqaki rúmasee sánda minásaa qusúsee faandaamura meerái márufaqa míriqoo qámbaanaqari káqikaa kooqi áuqiranakiqari qiní ruqíaeeqeeqa quiqa quiqa qufaqa maqásaa áqufufaqa quqásee sandáqiafana.